בְּרֵאשִׁית- טֶעָמֵי הַמִּקְרָא- פרק עֶשֶׂר.

אחד. וְאֵ֨לֶּה֙ תּֽוֹלְדֹ֣ת בְּנֵי־נֹ֔חַ שֵׁ֖ם חָ֣ם וָיָ֑פֶת וַיִּוָּֽלְד֥וּ לָהֶ֛ם בָּנִ֖ים אַחַ֥ר הַמַּבּֽוּל׃

שנים. בְּנֵ֣י יֶ֔פֶת גֹּ֣מֶר וּמָג֔וֹג וּמָדַ֖י וְיָוָ֣ן וְתֻבָ֑ל וּמֶ֖שֶׁךְ וְתִירָֽס׃

וּבְנֵ֖י גֹּ֑מֶר אַשְׁכְּנַ֥ז וְרִיפַ֖ת וְתֹֽגַרְמָֽה׃

וּבְנֵ֥י יָוָ֖ן אֱלִישָׁ֣ה וְתַרְשִׁ֑ישׁ כִּתִּ֖ים וְדֹֽדָנִֽים׃

מֵ֠אֵלֶּה נִפְרְד֞וּ אִיֵּ֤י הַגּוֹיִם֙ בְּאַרְצֹתָ֔ם אִ֖ישׁ לִלְשֹׁנ֑וֹ לְמִשְׁפְּחֹתָ֖ם בְּגֽוֹיֵהֶֽם׃

שלוש. וּבְנֵ֖י חָ֑ם כּ֥וּשׁ וּמִצְרַ֖יִם וּפ֥וּט וּכְנָֽעַן׃

וּבְנֵ֣י כ֔וּשׁ סְבָא֙ וַֽחֲוִילָ֔ה וְסַבְתָּ֥ה וְרַעְמָ֖ה וְסַבְתְּכָ֑א וּבְנֵ֥י רַעְמָ֖ה שְׁבָ֥א וּדְדָֽן׃

וְכ֖וּשׁ יָלַ֣ד אֶת־נִמְרֹ֑ד ה֣וּא הֵחֵ֔ל לִֽהְי֥וֹת גִּבֹּ֖ר בָּאָֽרֶץ׃ הֽוּא־הָיָ֥ה גִבֹּֽר־צַ֖יִד לִפְנֵ֣י יְהוָ֑ה עַל־כֵּן֙ יֵֽאָמַ֔ר כְּנִמְרֹ֛ד גִּבּ֥וֹר צַ֖יִד לִפְנֵ֥י יְהוָֽה׃

וַתְּהִ֨י רֵאשִׁ֤ית מַמְלַכְתּוֹ֙ בָּבֶ֔ל וְאֶ֖רֶךְ וְאַכַּ֣ד וְכַלְנֵ֑ה בְּאֶ֖רֶץ שִׁנְעָֽר׃ מִן־הָאָ֥רֶץ הַהִ֖וא יָצָ֣א אַשּׁ֑וּר וַיִּ֨בֶן֙ אֶת־נִ֣ינְוֵ֔ה וְאֶת־רְחֹבֹ֥ת עִ֖יר וְאֶת־כָּֽלַח׃ וְֽאֶת־רֶ֔סֶן בֵּ֥ין נִֽינְוֵ֖ה וּבֵ֣ין כָּ֑לַח הִ֖וא הָעִ֥יר הַגְּדֹלָֽה׃

וּמִצְרַ֡יִם יָלַ֞ד אֶת־לוּדִ֧ים וְאֶת־עֲנָמִ֛ים וְאֶת־לְהָבִ֖ים וְאֶת־נַפְתֻּחִֽים׃ וְֽאֶת־פַּתְרֻסִ֞ים וְאֶת־כַּסְלֻחִ֗ים אֲשֶׁ֨ר יָֽצְא֥וּ מִשָּׁ֛ם פְּלִשְׁתִּ֖ים וְאֶת־כַּפְתֹּרִֽים׃

וּכְנַ֗עַן יָלַ֛ד אֶת־צִידֹ֥ן בְּכֹר֖וֹ וְאֶת־חֵֽת׃ וְאֶת־הַיְבוּסִי֙ וְאֶת־הָ֣אֱמֹרִ֔י וְאֵ֖ת הַגִּרְגָּשִֽׁי׃ וְאֶת־הַֽחִוִּ֥י וְאֶת־הַֽעַרְקִ֖י וְאֶת־הַסִּינִֽי׃ וְאֶת־הָֽאַרְוָדִ֥י וְאֶת־הַצְּמָרִ֖י וְאֶת־הַֽחֲמָתִ֑י וְאַחַ֣ר נָפֹ֔צוּ מִשְׁפְּח֖וֹת הַֽכְּנַעֲנִֽי׃

וַיְהִ֞י גְּב֤וּל הַֽכְּנַעֲנִי֙ מִצִּידֹ֔ן בֹּֽאֲכָ֥ה גְרָ֖רָה עַד־עַזָּ֑ה בֹּֽאֲכָ֞ה סְדֹ֧מָה וַֽעֲמֹרָ֛ה וְאַדְמָ֥ה וּצְבֹיִ֖ם עַד־לָֽשַׁע׃ אֵ֣לֶּה בְנֵי־חָ֔ם לְמִשְׁפְּחֹתָ֖ם לִלְשֹֽׁנֹתָ֑ם בְּאַרְצֹתָ֖ם בְּגֽוֹיֵהֶֽם׃

ארבע. וּלְשֵׁ֥ם יֻלַּ֖ד גַּם־ה֑וּא אֲבִי֙ כָּל־בְּנֵי־עֵ֔בֶר אֲחִ֖י יֶ֥פֶת הַגָּדֽוֹל׃ בְּנֵ֥י שֵׁ֖ם עֵילָ֣ם וְאַשּׁ֑וּר וְאַרְפַּכְשַׁ֖ד וְל֥וּד  וַֽאֲרָֽם׃

וּבְנֵ֖י אֲרָ֑ם ע֥וּץ וְח֖וּל וְגֶ֥תֶר וָמַֽשׁ׃

וְאַרְפַּכְשַׁ֖ד יָלַ֣ד אֶת־שָׁ֑לַח וְשֶׁ֖לַח יָלַ֥ד אֶת־עֵֽבֶר׃

וּלְעֵ֥בֶר יֻלַּ֖ד שְׁנֵ֣י בָנִ֑ים שֵׁ֣ם הָֽאֶחָ֞ד פֶּ֗לֶג כִּ֤י בְיָמָיו֙ נִפְלְגָ֣ה הָאָ֔רֶץ וְשֵׁ֥ם אָחִ֖יו יָקְטָֽן׃

וְיָקְטָ֣ן יָלַ֔ד אֶת־אַלְמוֹדָ֖ד וְאֶת־שָׁ֑לֶף וְאֶת־חֲצַרְמָ֖וֶת וְאֶת־יָֽרַח׃ וְאֶת־הֲדוֹרָ֥ם וְאֶת־אוּזָ֖ל וְאֶת־דִּקְלָֽה׃ וְאֶת־עוֹבָ֥ל וְאֶת־אֲבִֽימָאֵ֖ל וְאֶת־שְׁבָֽא׃ וְאֶת־אוֹפִ֥ר וְאֶת־חֲוִילָ֖ה וְאֶת־יוֹבָ֑ב כָּל־אֵ֖לֶּה בְּנֵ֥י יָקְטָֽן׃

וַיְהִ֥י מֽוֹשָׁבָ֖ם מִמֵּשָׁ֑א בֹּֽאֲכָ֥ה סְפָ֖רָה הַ֥ר הַקֶּֽדֶם׃

אֵ֣לֶּה בְנֵי־שֵׁ֔ם לְמִשְׁפְּחֹתָ֖ם לִלְשֹֽׁנֹתָ֑ם בְּאַרְצֹתָ֖ם לְגֽוֹיֵהֶֽם׃

חמש. אֵ֣לֶּה מִשְׁפְּחֹ֧ת בְּנֵי־נֹ֛חַ לְתֽוֹלְדֹתָ֖ם בְּגֽוֹיֵהֶ֑ם וּמֵאֵ֜לֶּה נִפְרְד֧וּ הַגּוֹיִ֛ם בָּאָ֖רֶץ אַחַ֥ר הַמַּבּֽוּל׃

בראשית מנוקד עם טעמי המקרא. חלוקה לפרקים:
אחד. שנים. שלוש. ארבע. חמש.
שש. שבע. שמונה. תשע. עשר.
עשתי עשר. שנים עשר. שלשה עשר. ארבעה עשר. חמישה עשר.
ששה עשר. שבעה עשר. שמונה עשר. תשעה עשר. עשרים.
אחד ועשרים. שנים ועשרים. שלשה ועשרים. ארבעה ועשרים. חמישה ועשרים.
ששה ועשרים. שבעה ועשרים. שמונה ועשרים. תשעה ועשרים. שלשים.
אחד ושלשים. שנים ושלשים. שלשה ושלשים. ארבעה ושלשים. חמישה ושלשים.
ששה ושלשים. שבעה ושלשים. שמונה ושלשים. תשעה ושלשים. ארבעים.

בראשית- לא מנוקד- פרק עשר.

ואלה תולדת בני-נח, שם חם ויפת; ויולדו להם בנים, אחר המבול.  בני יפת–גמר ומגוג, ומדי ויון ותבל; ומשך, ותירס. ובני, גמר–אשכנז וריפת, ותגרמה. ובני יון, אלישה ותרשיש, כתים, ודדנים.  מאלה נפרדו איי הגוים, בארצתם, איש, ללשנו–למשפחתם, בגויהם. ובני, חם–כוש ומצרים, ופוט וכנען. ובני כוש–סבא וחוילה, וסבתה ורעמה וסבתכא; ובני רעמה, שבא ודדן.  וכוש, ילד את-נמרד; הוא החל, להיות גבר בארץ. הוא-היה גבר-ציד, לפני יהוה; על-כן, יאמר, כנמרד גבור ציד, לפני יהוה. ותהי ראשית ממלכתו בבל, וארך ואכד וכלנה, בארץ, שנער.  מן-הארץ ההוא, יצא אשור; ויבן, את-נינוה, ואת-רחבת עיר, ואת-כלח. ואת-רסן, בין נינוה ובין כלח–הוא, העיר הגדלה. ומצרים ילד את-לודים ואת-ענמים, ואת-להבים–ואת-נפתחים. ואת-פתרסים ואת-כסלחים, אשר יצאו משם פלשתים–ואת-כפתרים.

וכנען, ילד את-צידן בכרו–ואת-חת.  ואת-היבוסי, ואת-האמרי, ואת, הגרגשי. ואת-החוי ואת-הערקי, ואת-הסיני. ואת-הארודי ואת-הצמרי, ואת-החמתי; ואחר נפצו, משפחות הכנעני. ויהי גבול הכנעני, מצידן–באכה גררה, עד-עזה:  באכה סדמה ועמרה, ואדמה וצבים–עד-לשע. אלה בני-חם, למשפחתם ללשנתם, בארצתם, בגויהם.

ולשם ילד, גם-הוא:  אבי, כל-בני-עבר–אחי, יפת הגדול. בני שם, עילם ואשור, וארפכשד, ולוד וארם. י,כג ובני, ארם–עוץ וחול, וגתר ומש. וארפכשד, ילד את-שלח; ושלח, ילד את-עבר.  ולעבר ילד, שני בנים:  שם האחד פלג, כי בימיו נפלגה הארץ, ושם אחיו, יקטן. ויקטן ילד, את-אלמודד ואת-שלף, ואת-חצרמות, ואת-ירח. ואת-הדורם ואת-אוזל, ואת-דקלה. ואת-עובל ואת-אבימאל, ואת-שבא. ואת-אופר ואת-חוילה, ואת-יובב; כל-אלה, בני יקטן. ויהי מושבם, ממשא, באכה ספרה, הר הקדם. אלה בני-שם, למשפחתם ללשנתם, בארצתם, לגויהם. אלה משפחת בני-נח לתולדתם, בגויהם; ומאלה נפרדו הגוים, בארץ–אחר המבול.

.